मितिः २०८३।०५।१३

भोटेकोशी बाढीले बगाएर चितवनस्थित नारायणी नदीमा फेला परी पहिचान हुन बाँकी शव व्यवस्थापनसम्बन्धी समाचार संकलन गर्न पत्रकार राधेश्याम खतिवडा र सन्तकुमार चौधरीलगायतलाई सुरक्षाकर्मीले रोक लगाएको घटनाप्रति नेपाल पत्रकार महासंघको ध्यानाकर्षण भएको छ ।

यही भाद्र १० गतेको बाढीले बगाएर ल्याएका शव व्यवस्थापन गर्न बनाउँदै गरेको संरचनासम्बन्धी समाचार संकलनमा अवरोध गरिएको महासंघ चितवन शाखाले जनाएको छ । पत्रकार खतिवडाको मोबाइल नियन्त्रणमा लिई फोटो/भिडियो समेत मेटाइएको शाखाको भनाइ छ ।

आमसरोकारको विषयमा नागरिकलाई सुसूचित गराउने धर्म निर्वाहमा पत्रकारलाई अवरोध पुर्‍याउनु आपत्तिजनक र प्रेस स्वतन्त्राविरोधी कार्य हो । महासंघ यो घटनाको भर्त्सना गर्दछ ।

महासंघ आगामी दिनमा यस प्रकारको व्यवहार नदोहोर्‍याउन र निर्वाध रूपमा सञ्चारकर्ममा जुट्ने वातावरण बनाउन सम्बन्धित निकायसँग माग गर्दछ ।

रामप्रसाद दाहाल

महासचिव